സങ്കീര്ത്തനങ്ങള് 13 : 1-6
കര്ത്താവേ, എത്രനാള് അങ്ങെന്നെ മറക്കും? എന്നേക്കുമായി എന്നെ വിസ്മരിക്കുമോ? എത്രനാള് അങ്ങയുടെ മുഖം എന്നില്നിന്നു മറച്ചുപിടിക്കും?
എത്രനാള് ഞാന് വേദന സഹിക്കണം? എത്രനാള് രാപകല് ഹൃദയവ്യഥയനുഭവിക്കണം? എത്രനാള് എന്റെ ശത്രു എന്നെ ജയിച്ചുനില്ക്കും?
എന്റെ ദൈവമായ കര്ത്താവേ, എന്നെ കടാക്ഷിച്ച് ഉത്തരമരുളണമേ! ഞാന് മരണനിദ്രയില് വഴുതി വീഴാതിരിക്കാന് എന്റെ നയനങ്ങളെ പ്രകാശിപ്പിക്കണമേ!
ഞാനവനെ കീഴ്പെടുത്തി എന്ന് എന്റെ ശത്രു പറയാന് ഇടയാക്കരുതേ! ഞാന് പരിഭ്രമിക്കുന്നതുകണ്ട് എന്റെ ശത്രു ആനന്ദിക്കാന് ഇടവരുത്തരുതേ!
ഞാന് അവിടുത്തെ കരുണയില് ആശ്രയിക്കുന്നു; എന്റെ ഹൃദയം അങ്ങയുടെ രക്ഷയില് ആനന്ദം കൊള്ളും.
ഞാന് കര്ത്താവിനെ പാടിസ്തുതിക്കും; അവിടുന്ന് എന്നോട് അതിരറ്റകരുണ കാണിച്ചിരിക്കുന്നു.
Comments
Post a Comment