പുതുപ്പള്ളി പുണ്യാളച്ചൻ്റെ ഓർമ്മപ്പെരുന്നാളിന് കൊടിയേറ്റ് കർമ്മം നിർവ്വഹിച്ചു

 പുതുപ്പള്ളി പുണ്യാളച്ചൻ്റെ ഓർമ്മപ്പെരുന്നാളിന് തുടക്കം കുറിച്ചുകൊണ്ട് കൊടിയേറ്റ് കർമ്മം നിർവ്വഹിച്ചു.

കോട്ടയം : ചരിത്ര പ്രസിദ്ധമായ പുതുപ്പള്ളി പുണ്യാളച്ചൻ്റെ ഓർമ്മപ്പെരുന്നാളിന് തുടക്കം കുറിച്ചുകൊണ്ട്, പുതുപ്പള്ളി യാക്കോബായ പള്ളിയിൽ കോട്ടയം ഭദ്രാസനാധിപൻ അഭിവന്ദ്യ ഡോ. തോമസ് മോർ തീമോത്തിയോസ് മെത്രാപ്പൊലീത്ത കൊടിയേറ്റ് കർമ്മം ഇന്നലെ വൈകുന്നേരം 5 മണിക്ക്‌ നിർവ്വഹിച്ചു. പെരുന്നാളിനോട്‌ അനുബന്ധിച്ച് പള്ളിയിൽ രാവിലെ അഭിവന്ദ്യ മെത്രാപ്പൊലീത്തയുടെ പ്രധാന  കാർമിത്വത്തിൽ വിശുദ്ധ കുർബ്ബാന നടത്തപ്പെട്ടിരുന്നു. ഉച്ചക്ക് 2 മണിക്ക്‌ വകത്താനം പതിനഞ്ചിൽ ശ്രീ. ബിജു പുന്നൂസിൻ്റെ ഭവനാംഗണത്തിൽ നിന്നും ആഘോഷപൂർവ്വം ഞാലിയാകുഴി, പുതുപ്പള്ളി കവല വഴി പള്ളിയിലേക്ക് കൊടിമര ഘോഷയാത്ര നടത്തി. തുടർന്ന് നടന്ന സന്ധ്യാ നമസ്കാരത്തിന് ശേഷമായിരുന്നു കോടിയേറ്റ് കർമ്മം നിർവഹിക്കപ്പെട്ടത്.

2026 ഏപ്രിൽ 25 ശനിയാഴ്ച്ച വൈകുന്നേരം 6 മണിക്ക്‌ പെരുന്നാൾ സന്ധ്യ നമസ്കാരം, അഖില മലങ്കര വൈദിക സെക്രട്ടറി റവ.ഫാ. ജോൺ ഐപ്പ് മങ്ങാട്ട് നൽകുന്ന പെരുന്നാൾ സന്ദേശം, രാത്രി 8 മണിക്ക്‌ ഭക്തി നിർഭരമായ റാസ, തുടർന്ന് സ്നേഹ വിരുന്ന് എന്നിവ നടത്തപ്പെടും. പ്രധാന പെരുന്നാൾ ദിനമായ എപ്രിൽ 26 ഞായറാഴ്ച്ച വെളുപ്പിന് 12 മണിക്ക്‌ വെച്ചൂട്ട് നേർച്ചക്കുള്ള അരിയിടീൽ ചടങ്ങ്, രാവിലെ 9 മണിക്ക്‌ ശ്രേഷ്‌ഠ കാതോലിക്കായും, മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് ബാവയുടെ പ്രധാന കാർമിത്വത്തിൽ വിശുദ്ധ കുർബ്ബാന, തുടർന്ന് പ്രദക്ഷിണം,  ആശീർവ്വാദം, ചരിത്ര പ്രസിദ്ധമായ വെച്ചൂട്ട് നേർച്ച എന്നിവ നടത്തപ്പെടും. മെയ് 10 ഞായറാഴ്ച കൊടിയിറക്കുന്നതോടെ പെരുന്നാൾ ചടങ്ങുകൾ സമാപിക്കും.