മിഷിഗൺ സിനഗോഗ് ആക്രമണം

 മിഷിഗൺ സിനഗോഗ് ആക്രമണം: പ്രതിയുടെ സഹോദരൻ കൊല്ലപ്പെട്ട ഹിസ്ബുള്ള കമാൻഡറെന്ന് ഇസ്രായേൽ

മിഷിഗണിലെ സിനഗോഗിലേക്ക് സ്ഫോടകവസ്തുക്കളുമായി കാർ ഓടിച്ചു കയറ്റിയ അയ്മൻ മുഹമ്മദ് ഗസാലിയുടെ സഹോദരൻ ഹിസ്ബുള്ള കമാൻഡറാണെന്ന് ഇസ്രായേൽ പ്രതിരോധ സേന (IDF). കഴിഞ്ഞ ആഴ്ച ഇസ്രായേൽ നടത്തിയ വ്യോമാക്രമണത്തിൽ കൊല്ലപ്പെട്ട ഹിസ്ബുള്ള കമാൻഡർ ഇബ്രാഹിം മുഹമ്മദ് ഗസാലിയുടെ സഹോദരനാണ് അയ്മൻ എന്നാണ് ഐഡിഎഫ് അവകാശപ്പെടുന്നത്. ഇബ്രാഹിം ഹിസ്ബുള്ളയിലെ 'ബദർ യൂണിറ്റിന്റെ' ആയുധ പ്രവർത്തനങ്ങൾ നിയന്ത്രിച്ചിരുന്ന ആളാണെന്നും ഇസ്രായേലിന് നേരെ നൂറുകണക്കിന് റോക്കറ്റുകൾ തൊടുത്തുവിട്ടതിന് പിന്നിൽ ഇയാളാണെന്നും സൈന്യം എക്സിലൂടെ (X) വിശദീകരിച്ചു.

2011-ൽ ലെബനനിൽ നിന്ന് അമേരിക്കയിലേക്ക് കുടിയേറിയ അയ്മൻ, മിഷിഗണിലെ ജൂത ദേവാലയത്തിന് നേരെ നടത്തിയ ആക്രമണത്തിനിടെ പോലീസുമായുള്ള വെടിവെപ്പിനിടയിൽ സ്വയം വെടിവെച്ചാണ് മരിച്ചത്. ഇയാളുടെ വാഹനത്തിൽ വൻതോതിൽ സ്ഫോടകവസ്തുക്കൾ കണ്ടെത്തിയിരുന്നു. ആക്രമണത്തിൽ സുരക്ഷാ ഉദ്യോഗസ്ഥർക്ക് പരിക്കേറ്റെങ്കിലും സിനഗോഗിലുണ്ടായിരുന്ന കുട്ടികളും ജീവനക്കാരും സുരക്ഷിതരാണ്. എഫ്ബിഐ (FBI) കേസിൽ വിശദമായ അന്വേഷണം നടത്തിവരികയാണ്.