ട്രംപിന്റെ ‘ബോർഡ് ഓഫ് പീസ്’യിൽ ചേരാനുള്ള ക്ഷണം പരിശുദ്ധ സിംഹാസനം നിരസിച്ചു.

 സംഘർഷം ബാധിച്ച ആഗോള മേഖലകളുടെ ഭരണനിർവഹണമാണ് ലക്ഷ്യമെന്ന് പറയുന്ന പ്രസിഡന്റ് ഡൊണാൾഡ് ട്രംപിന്റെ ‘ബോർഡ് ഓഫ് പീസ്’യിൽ ചേരാനുള്ള ക്ഷണം പരിശുദ്ധ സിംഹാസനം നിരസിച്ചു.

 “ബോർഡ് ഓഫ് പീസ് എന്നത് മറ്റു രാജ്യങ്ങളുടെ താല്പര്യങ്ങളെ താരതമ്യം ചെയ്യുമ്പോൾ ചേർന്നുപോകാത്ത പ്രത്യേക സ്വഭാവമുള്ളതാണ്. അതിനാൽ വത്തിക്കാൻ അതിൽ പങ്കെടുക്കില്ല.” വത്തിക്കാൻ സ്റ്റേറ്റ് സെക്രട്ടറി കാർഡിനൽ പിയെട്രോ പാരോളിൻ മാധ്യമപ്രവർത്തകരോട് പറഞ്ഞു.

ഇറ്റലി നിരീക്ഷകനായി ബോർഡിൽ പങ്കെടുക്കുന്നതിനെക്കുറിച്ച് ചോദിച്ചപ്പോൾ, ബോർഡിന്റെ ചില കാര്യങ്ങൾ “ഒരു പരിധിവരെ ആശങ്കയുണർത്തുന്നതാണ്” എന്ന് പാരോളിൻ പറഞ്ഞു.

“വ്യക്തത ആവശ്യമായ ചില നിർണായക വിഷയങ്ങൾ ഉണ്ട്. പ്രധാന കാര്യം ഒരു മറുപടി നൽകാനുള്ള ശ്രമം നടക്കുന്നുവെന്നതാണ്,” അദ്ദേഹം വ്യക്തമാക്കി.

“എന്നാൽ,  പരിഹരിക്കേണ്ട ചില നിർണായക വിഷയങ്ങൾ ഇപ്പോഴും നിലനിൽക്കുന്നു,” എന്ന് അദ്ദേഹം പറഞ്ഞു. “ആഗോള തലത്തിൽ ഈ തരത്തിലുള്ള പ്രതിസന്ധി സാഹചര്യങ്ങൾ പ്രധാനമായും ഐക്യരാഷ്ട്രസഭയാണ് കൈകാര്യം ചെയ്യുന്നത്. ഈ വിഷയത്തിലാണ് ഞങ്ങൾ കൂടുതൽ പ്രാധാന്യം നൽകിയിരിക്കുന്നത്,” എന്നും അദ്ദേഹം കൂട്ടിച്ചേർത്തു.

അമേരിക്കൻ ഭരണകൂടം പോപ്പ് ലിയോ XIV-നെയും വത്തിക്കാനെയും പുതിയതായി രൂപീകരിച്ച ബോർഡ് ഓഫ് പീസിൽ ചേരാൻ ക്ഷണിച്ചതിന് പിന്നാലെ, ജനുവരി 21-ന് പാരോളിൻ ഈ സംരംഭത്തിൽ ചേരണമോ എന്ന് വത്തിക്കാൻ പരിഗണിക്കുകയാണെന്ന് പറഞ്ഞിരുന്നു. പിന്നീട് ജെറുസലേമിലെ ലാറ്റിൻ പാത്രിയാർക്ക് കാർഡിനൽ പിയർബട്ടിസ്റ്റ പിസ്സബല്ലാ ഈ സംരംഭത്തെ “ഒരു കോളോണിയൽ നടപടി” എന്ന് വിശേഷിപ്പിക്കുകയും, “ഇത് സഭയുടെ ദൗത്യം അല്ല” എന്നും അഭിപ്രായപ്പെട്ടു.

ഹംഗറി, അർജന്റീന എന്നിവ ഉൾപ്പെടെ 25-ത്തിലധികം രാജ്യങ്ങൾ ബോർഡിൽ ചേരുകയും ചെയ്തു. ലോകമെമ്പാടുമുള്ള സംഘർഷങ്ങൾ പരിഹരിക്കുകയാണ് ഇതിന്റെ ഉദ്ദേശ്യം. എന്നാൽ യുകെ, ന്യൂസീലൻഡ്, ജർമ്മനി, ഫ്രാൻസ് എന്നിവ ഉൾപ്പെടെ ചില രാജ്യങ്ങൾ ക്ഷണം നിരസിച്ചു.

ഈ ബോർഡ് ഐക്യരാഷ്ട്രസഭയ്ക്ക് പകരക്കാരനായി രൂപീകരിക്കാനുള്ള ശ്രമമാണെന്നാണ് വിലയിരുത്തപ്പെടുന്നത്. ഇതിനെതിരെ ലിബറൽ ചിന്താഗതിക്കാരും ഗ്ലോബലിസ്റ്റുകളും പ്രതിഷേധം രേഖപ്പെടുത്തി.

ഇക്കഴിഞ്ഞ ദശകങ്ങളിൽ ഐക്യരാഷ്ട്രസഭ ക്രിസ്തീയ മൂല്യങ്ങൾക്ക് ശക്തമായ എതിരാളിയായി മാറിയതായി വിലയിരുത്തപ്പെടുന്നു. ഗർഭച്ഛിദ്രം, ഗർഭനിരോധനം, ജനസംഖ്യ കുറയ്ക്കൽ ശ്രമങ്ങൾ, സമലിംഗകത്വം, ട്രാൻസ്ജെൻഡറിസം (കുട്ടികളിൽ “ലിംഗമാറ്റം” ഉൾപ്പെടെ), ലൈംഗിക വിദ്യാഭ്യാസം എന്നിവ പ്രോത്സാഹിപ്പിക്കുന്നതിലൂടെ ‘ജീവൻ-കുടുംബ’ വിരുദ്ധ നയങ്ങൾ മുന്നോട്ട് വെച്ചുവെന്ന വിമർശനമുണ്ട്. പ്രോ-ലൈഫ്, പ്രോ-ഫാമിലി നയങ്ങൾ ഉപേക്ഷിക്കാൻ വിവിധ രാജ്യങ്ങളെ യു.എൻ. സമ്മർദ്ദപ്പെടുത്തിയതായും ആരോപണമുണ്ട്.

ക്ലൈമറ്റ് നയങ്ങൾ, കോവിഡ് നിയന്ത്രണങ്ങൾ എന്നിവയും യു.എൻ. ശക്തമായി പ്രോത്സാഹിപ്പിച്ചതായി വിമർശകർ ചൂണ്ടിക്കാട്ടുന്നു. കൂടാതെ വിവാഹം, മാതാപിതൃ അവകാശങ്ങൾ (വിദ്യാഭ്യാസത്തിലും ആരോഗ്യപരിചരണ തീരുമാനങ്ങളിലും), അഭിപ്രായസ്വാതന്ത്ര്യം, മതസ്വാതന്ത്ര്യം എന്നിവയും ഇത് ബാധിച്ചതായാണ് ചിലരുടെ ആരോപണം.

രാജ്യങ്ങളുടെ സ്വയംഭരണത്തെ യു.എൻ. ഭീഷണിപ്പെടുത്തുന്നു എന്നും ആഗോള സമാധാനം ഉറപ്പാക്കുന്നതിൽ പരാജയപ്പെട്ടു എന്നും സംരക്ഷണവാദികൾ ഏറെ നാളായി വിമർശിച്ചു വരുന്നു.

“ഐക്യരാഷ്ട്രസഭ ഇക്കാര്യങ്ങളിൽ സഹായകരമായിരുന്നില്ല,” എന്ന് ട്രംപ് ചൊവ്വാഴ്ച പറഞ്ഞു. ബോർഡ് ഓഫ് പീസ് ഐക്യരാഷ്ട്രസഭയ്ക്ക് പകരമാകാമെന്ന സൂചനയും അദ്ദേഹം നൽകിയിട്ടുണ്ട്.

ഗാസയ്ക്കുള്ള സമാധാന നിർദ്ദേശത്തിന്റെ ഭാഗമായി മാസങ്ങൾക്ക്‌ മുൻപാണ് ട്രംപ് ഈ ബോർഡിന്റെ പദ്ധതികൾ പ്രഖ്യാപിച്ചത്. എന്നാൽ മറ്റ് മേഖലകളിലും ഇത് ശ്രദ്ധ കേന്ദ്രീകരിക്കുമെന്ന് അദ്ദേഹം പിന്നീട് വ്യക്തമാക്കിയിരുന്നു.