കരൾ രോഗങ്ങളുടെ മധ്യസ്ഥൻ
കരൾ സംബന്ധമായ രോഗങ്ങൾ വളരെ സാധാരണമായിക്കൊണ്ടിരിക്കുകയാണ്. അത്തരം ആരോഗ്യ പ്രശ്നങ്ങൾ ഉള്ളവർക്ക് പ്രാർഥനാ സഹായം ചോദിക്കാൻ സാധിക്കുന്ന വിശുദ്ധനാണ് വി. ഇറാസ്മസ്. ഈ വിശുദ്ധന്റെ ജീവിതത്തെക്കുറിച്ച് നമുക്ക് വളരെക്കുറച്ചേ അറിയൂ. അദ്ദേഹത്തിന്റെ ജനനത്തീയതിയും സ്ഥലവും അജ്ഞാതമാണ്. എ.ഡി. രണ്ടാം നൂറ്റാണ്ടിൽ ഇറ്റലിയിലെ ഫോർമിയയിലെ ബിഷപ്പായിരുന്നു അദ്ദേഹം എന്ന വിവരം ലഭ്യമാണ്.
വിശുദ്ധ ഇറാസ്മസിന്റെ ജീവിതകാലത്ത് ഏതോ ഒരു ഘട്ടത്തിൽ, ഫോർമിയയിൽ തീപിടുത്തം സംഭവിച്ചു. അത് നഗരത്തെ മുഴുവൻ ചുട്ടെരിച്ചു. ആ സമയത്ത്, അദ്ദേഹം ഗെയ്റ്റയിലേക്ക് താമസം മാറി. ഗെയ്റ്റ ഒരു തീര പ്രദേശമായിരുന്നു. അദ്ദേഹത്തിന്റെ വിശുദ്ധി ആ പ്രദേശത്ത് പ്രസിദ്ധമായിരുന്നു. അതിനാൽ, നാവികർ അദ്ദേഹത്തിന്റെ സഹായം അഭ്യർഥിച്ചിരുന്നു. കപ്പലുകൾക്ക് ചുറ്റും കാണപ്പെടുന്ന നീല വൈദ്യുത ഡിസ്ചാർജുകൾ അദ്ദേഹത്തിന്റെ രക്ഷാധികാരത്തിന്റെയും സംരക്ഷണത്തിന്റെയും ഫലമാണെന്ന് കണക്കാക്കപ്പെട്ടു.
വിശുദ്ധ ഇറാസ്മസിനെക്കുറിച്ച് നമുക്കറിയാവുന്ന മിക്കതും ഒരു ഐതിഹ്യമാണ്. ഒരു ക്രിസ്ത്യാനിയായതിന്റെ പേരിൽ വിശുദ്ധ ഇറാസ്മസ്, ലെബനൻ പർവതത്തിൽ ഒളിച്ചിരുന്നുവെന്ന് ഒരു പാരമ്പര്യം പറയുന്നു. അവിടെ, ഒരു കാക്ക അദ്ദേഹത്തിന് എത്തിച്ചുകൊടുത്ത ഭക്ഷണം കഴിച്ചാണ് അദ്ദേഹം ജീവിച്ചതെന്ന് കണക്കാക്കപ്പെടുന്നു. അദ്ദേഹം അവിടെ ഒറ്റയ്ക്ക് താമസിച്ചു. കുറച്ചു കാലത്തിനുശേഷം, ക്രൈസ്തവ പീഡനത്തിന്റെ ഫലമായി അദ്ദേഹത്തെ പിടികൂടി, പീഡിപ്പിച്ച്, ജയിലിലടച്ചു. ഒരു മാലാഖയാണ് അദ്ദേഹത്തെ ജയിലിൽ നിന്നും രക്ഷപ്പെടുത്തിയതെന്ന് ഐതിഹ്യം പറയുന്നു.
വിശുദ്ധ ഇറാസ്മസ് എങ്ങനെ മരിച്ചു എന്നതിനെ ചുറ്റിപ്പറ്റിയുള്ള മറ്റൊരു കഥ കൂടിയുണ്ട്. ഡയോക്ലീഷ്യന്റെ കീഴിൽ ക്രിസ്തീയ പീഡനത്തിന്റെ ഫലമായിട്ടാണ് അദ്ദേഹം രക്തസാക്ഷിയായതെന്ന് കണക്കാക്കുന്നു. അദ്ദേഹം മരിച്ചതെങ്ങനെയെന്ന് അത്ര വ്യക്തമല്ല. നങ്കൂരങ്ങൾ ഉയർത്താൻ ഉപയോഗിക്കുന്ന മൂർച്ചയുള്ള ഒരു വിൻഡ്ലാസ് അദ്ദേഹത്തിന്റെ കുടലിൽ കുത്തിയിറക്കിയാണ് അദ്ദേഹം പീഡിപ്പിക്കപ്പെട്ടതെന്ന് പലരും വിശ്വസിക്കുന്നു. 303-ൽ വിശുദ്ധ ഇറാസ്മസ് ഈ കുടൽ ഛേദിക്കപ്പെട്ടാണ് മരിച്ചതെന്ന് പൊതുവെ വിശ്വസിക്കപ്പെടുന്നു. അതിന്റെ ഫലമായി കുടലിൽ ഒരു വിൻഡ്ലാസ് പിടിച്ചിരിക്കുന്നതായി അദ്ദേഹം പലപ്പോഴും ചിത്രീകരിക്കപ്പെടുന്നു.
വിശുദ്ധ ഇറാസ്മസിന്റെ ജീവിതത്തെക്കുറിച്ച് നമുക്ക് അധികമൊന്നും അറിയില്ലെങ്കിലും, അദ്ദേഹം ശക്തനായ ഒരു മധ്യസ്ഥനാണെന്ന് നമുക്കറിയാം. വാസ്തവത്തിൽ, ബ്യൂബോണിക് പ്ലേഗിന്റെ സമയത്ത് മധ്യസ്ഥത തേടിയ പതിനാല് വിശുദ്ധ സഹായികളിൽ ഒരാളാണ് അദ്ദേഹം. അത്തരം പീഡനങ്ങളെ ചെറുക്കാൻ അദ്ദേഹത്തിന്റെ വിശ്വാസം ശക്തമായിരുന്നിരിക്കണം.
വയറുവേദന, പ്രത്യേകിച്ച് കുടൽ വേദന, കരൾ വേദന, പ്രസവവേദന, കടൽ ജോലി ചെയ്യുന്നവർ എന്നിവരുടെയെല്ലാം രക്ഷാധികാരിയാണ് വിശുദ്ധ ഇറാസ്മസ്
Comments
Post a Comment